الشاعرة عائشة إذكير عضوا الشبيبة العاملة المغربية بأكادير والجهة تهدي للطبقة العاملة المغربية بمناسبة عيدها الأممي فاتح ماي زجلا عن معاناة العمال والعاملات من منصة الإحتفال بمقر الإتحاد المغربي للشغل بأكادير
دوات كتافو
دوات كتافو تحت نجوم الليل
تنهد و تنين
صبرها و قال
مالك يا الخاطر
مابقيتي تخاطر
خليتي الروح تنسل مني و تهجرني هجران
خليتيها تهرب و تتعفر على ايامي تعفار
خلاتني كسدة
فيها غير العروق كتفاكم
كتتنتر على الحكرة و الغبنة
و الدموع نشفت ما بقات سيل ما بقات تقاطر
يا البارح يا المغرور
هز عينيك تشوف اليوم
هذا ما كنتي عليه تقول زاهر
هذا لي كنتي تحسب راسك عليه قادر
ذوق خيبة هاذ الخاطر
هاذ الجنان الطاهر
هاذ السبولة المجروحة لي ما وصلت مطمورة
ما سمعت غناية النادر
جاوباتو فاطنة باللوم
يا محمد يا عبد الله يا المختار يا الغافل
فين شهد النحلة فين سواقي العسل فين اللبن الخاثر فين
فين ضحكة مي دادا بين خيوط النيرة و الخلالة
تعلي الحكمات و تحكي على حايكي قصة لون الحربات
قالت يا بنتي
هذا غير ثوب يغطي
اللي عليه تسيل ريوك الذياب
و الذياب تقدر تنهش حتى ما غطى التراب
عري على الذراع و كوني فاس
كوني سيف كوني شوكة
كوني منذرة
الى حصدت قمح الزمان تدوزو فالدراس
كوني
كوني محراث بعدما تدردري روحك زرع
واخا يقولو ولية و مافيها نفع
انتي لي عليك الكون يدور
و لوﻻك ما كان عبد القادر فالدنيا يدور
كوني ﻻلة ياﻻلة بنت ﻻلة
الحصاد مازال ليه ايام شلة
الحصاد نهار بين وﻻدك توحدي الرجلة
لي ماتت و لي نعست و لي صمدت و نشوفوها اليوم
بالشهامة قايمة تتجلى
و بجنبك واقفة
و همومك هازة تتولى.
اييه ضحكات امي دادة الحكيمة
على العقول البهيمة
و عاشت ايامها مرة دليلة و مرة تتقوى بالحيلة
و انا فزمانك يا حقوق و يا حرية
ما رسمت بسمة مي دادة و ﻻ الشهبة ندية
بغيت نعيش فالوضوح و بالوضوح قوية
نرمي حيلة مي دادا لي مرة ينصحوني بيها و مرة يعيبوها عليا
ما لقيت فالدمرة ﻻ معيشة هنية و ﻻ فرحة بترقية
يا همي كيف نهرب كيف
كيف نهرس هاد سقف الزاج
وكيف نهرس هاد سقف الزاج
اكتشاف المزيد من النهار نيوز
اشترك للحصول على أحدث التدوينات المرسلة إلى بريدك الإلكتروني.
