“نقطة ف ريق السما” قصيدة للشاعرة صباح بنداود

“إيزار لموج…

لقصيدة حلمة عريانة
ومتكيا جنب الواد
ماغطست ف جوف الحجر
ماخلات لهوى يسقيها
عنقت راسها
وعولت تجيب المجاز من راس
حامل جار ف طريقو
طوفان لمعاني…
ومسدي الوقت على يدو
طامع ينج ليام…
ويرgمها مراة
لابسا لبحر
وتشالي بمواجو

هذي حكاية لقصيدة
تعاشر الشعر بالمروة
وتتعرى من لقوافي
تغرس قلبها ف المعنى
وتاكل من لكلام
تشك ف السطر
وتآمن بالكلمة
ترمي لحروف
ف إطار…
ويتحررو لوحة
تشرب الليل
وتصرفو gمرات
تغمز الورد
يعصر ليها قلبو
تزهر شذرة
وتفنى فيها
يشدها الله
ويغنيها…

أيييه هذي هي لقصيدة حلمة عريانة
شادة حق المعنى
فاش تكون جاية
تهول القلب
تغازل لحواس
تسهرك الليل بطولو
وتخرج هي كي شي عروسة
تتعرى ليك دقة دقة
تديك لجنب الليل…
وتشربك…

كي تغيب….
شمس وخلات دفاها …
خمرة وخلات سكرات…
ما د الموت ما دالحياة
هي نشوات
من لقصيدة.

صباح بنداوود

18 أبريل 2021